क्याम्पसमा सिमेस्टर प्रणालीको पुनर्ताजगी तालिम सम्पन्न

विश्वविद्यालय अनुदान आयोग नेपालीको वित्तीय सहयोग र क्याम्पसको आयोजनामा सिमेस्टर प्रणालीको पुनर्ताजगी तालिम सम्पन्न भएको छ । मिति २०८१ जेठ ४ गते देखि जेठ ६ गते सम्म तीन दिने पुनर्ताजगी कार्यक्रम सञ्चालन गरिएको थियो । कार्यक्रममा विभिन्न ४ वटा क्याम्पसका शिक्षक प्रतिनिधिहरू र सुकुना क्याम्पसका ४२ जना शिक्षकहरू सहभागी थिए । शुक्रबार विहान क्याम्पसको सभाकक्षमा क्याम्पस प्रमुख अर्जुनराज अधिकारीको अध्यक्षतामा सञ्चालित उद्घटन गरिएको कार्यक्रममा सञ्चालक समितिका अध्यक्ष केशव अधिकारीले सम्बोधन गर्नु भएको थियो । त्रिभुवन विश्वविद्यालय, शिक्षाशास्त्र सङ्काय, केन्द्रीय विभाग, कीर्तिपुर, काठमाडौँका प्राध्यापक डाक्टर पेशल खनाल र क्याम्पसका उपप्राध्यापक डाक्टर दीपकप्रसाद न्यौपानेले विषयविज्ञका रुपमा तीन दिनसम्म सहभागीहरूलाई सहजीकरण गर्नु भएको थियो । कार्यक्रममा सिमेस्टर प्रणालीका सैद्धान्तिक पक्षहरू, व्यवहारिक चुनौतिहरू, अपानाउनु पर्ने पद्धति, मूल्याङ्कनका पक्षहरु, अङ्कन पद्धति, सिर्जनात्मक कार्यहरू, विद्यार्थीका सिकाइका पक्षहरू, शिक्षण पद्धती, अभिलेखीकरण र शिक्षकको भूमिकाका विषयमा छलफल, अन्तर्क्रिया र कार्यशाला सञ्चालन गरिएको थियो । जेठ ६ गतेका दिन कार्यक्रमको समापन समारोहमा सहभागीहरूलाई प्रमाणपत्र वितरण गरिएको थियो । समापन कार्यक्रममा सहभागीहरूले तालिमको प्रतिविम्बन गरेका थिए ।

क्याम्सको आयोजनामा अन्तर्राष्ट्रिय वेबिनार सम्पन्न

सुकुना बहुमुखी क्याम्पसको आयोजना तथा आसाम डाउन टाउन युनिभर्सिटी, भारत र युनिभर्सिटी अफ इन्फर्मेसन टेक्नोलोजी एण्ड साइन्सेज, बङ्गलादेशको सहकार्यमा मिति २०८१ जेठ ३ गते (१६ मे २०२४) मा त्रिपक्षीय वेबिनार सम्पन्न भएको छ । ‘कक्षाकोठामा कृत्रिम बुद्धिमत्ता कार्यान्वयनका लागि अवसर’ (Opportunities for implementation of AI in the Classroom) विषयमा सम्पन्न उक्त वेबिनारमा सुकुना बहुमुखी क्याम्पसको तर्फबाट वि.आई.सि.टी.ई. कार्यक्रमका फोकल पर्सन इन्जिनियर सन्तोष दाहाल, आसाम डाउन टाउन युनिभर्सिटी, भारतका तर्फबाट कम्प्युटर टेक्नोलोजी सङ्कायका डीन डा. उत्पल वर्मन र युनिभर्सिटी अफ इन्फर्मेसन टेक्नोलोजी एण्ड साइन्सेज, बङ्गलादेशको तर्फबाट IQAC Cell का डाइरेक्टर इन्जिनियर मो. साफेत हुसेनले आ-आफ्नो प्रस्तुति दिनुभएको थियो । सुकुना बहुमुखी क्याम्पसका शिक्षक श्री उषाकिरण वाग्लेले सञ्चालन गर्नु भएको उक्त वेबिनारमा क्याम्पसको तर्फबाट क्याम्पस प्रमुख अर्जुनराज अधिकारी, राष्ट्रिय तथा अन्तर्राष्ट्रिय मामिला विभागका निर्देशक नवराज कोइराला, शिक्षक तथा विद्यार्थीहरू सहित ५० जना, आसाम डाउन टाउन युनिभर्सिटी, भारतका तर्फबाट उक्त विश्व विद्यालयका उपकुलपति प्रा.डा. एन. सि. तालुकदार, विश्वविद्यालयका विशिष्ट प्राध्यापकहरू, अन्तर्राष्ट्रिय मामिला विभागका सहायक निर्देशक सत्यब्रत शर्मा लगायत विद्यार्थीहरू सहित ५० जना र युनिभर्सिटी अफ इन्फर्मेसन टेक्नोलोजी एण्ड साइन्सेज, बङ्गलादेशको तर्फबाट उक्त विश्वविद्यालयका उपकुलपति प्रा. डा. अब्बु हसन भुइयाँ, IQAC Cell का डाइरेक्टर इन्जिनियर मो. साफेत हुसेन, प्राध्यापकहरू र विद्यार्थीसहित ५० जना गरी जम्मा १५० जनाको अनलाईन उपस्थितिमा उक्त वेबिनार सम्पन्न गरिएको थियो । एक घण्टा ३० मिनेट अवधिको सो वेबिनार युनिभर्सिटी अफ इन्फर्मेसन टेक्नोलोजी एण्ड साइन्सेजका उपकुलपति प्रा. डा. अब्बु हसन भुइयाँको मन्तव्य पश्चात समापन गरिएको थियो ।

क्याम्पसमा मनोक्रान्तिका प्रवर्तकडा. योगी विकासानन्द सँग साक्षात्कार

सुकुना बहुमुखी क्याम्पस‚ सुन्दरहरैँचा‚ मैरङको सभाकक्षमा मिति २०८० साल चैत्र २७ गते मङ्गलबार विहान मनोक्रान्तिका प्रवर्तक डा. योगी विकासानन्द र सञ्चालक समित‚ सल्लाहकार समिति‚ शिक्षक‚ कर्मचारी र विद्यार्थी प्रतिनिधिहरू सँग तनाव व्यवस्थापन‚ सकारात्मक सोचको विकास‚ असल आचरणको निर्माण‚ सम्मोहन उपचार विधि‚ योग‚ ध्यान‚ दार्शनिक विषयमा साक्षात्कार कार्यक्रम सम्पन्न भएको छ । डा. योगी विकासानन्दले कार्यक्रममा व्यक्तिको शक्ति मापन गर्दै शक्ति आर्जन गर्ने तरिका र सम्मोहन विधिको प्रयोग समेत गरेका थिए । मानिस किन दुखी हुन्छ र चरम सुख प्राप्त गर्न के कस्ता कार्यहरू गर्नु पर्दछ भन्ने विषयमा आफ्नो अनुभव सुनाउँदै सुखमय जीवनका लागि उत्प्रेरणा समेत दिएका थिए ।

क्याम्पसमा Advanced Research Methodology Course सञ्चालन

सुकुना बहुमुखी क्याम्पस‚ सुन्दरहरैँचा‚ मोरङ र काठमाडौं विश्वविद्यालय बिच भएको सम्झौताअनुसार शिक्षक तथा कर्मचारीहरूको आर्टिकल लेखन तथा प्रकाशन र खोज अनुसन्धान क्षमता विकास गर्न मिति २०८० फागुन २४ गते विहीबार देखि ३ क्रेडिटको ४८ घण्टे Advanced Research Methodology Course शुरु गरिएको छ । उक्त कोर्स काठमाडौं विश्वविद्यालयले सञ्चालन गर्ने र कोर्स सञ्चालनको लागतको ६६ प्रतिशत क्याम्पसले र ३३ प्रतिशत सम्बन्धित सहभागि शिक्षक एमव् कर्मचारीले बेहोर्ने गरी आर्थिक व्यवस्थापन गरिएको छ । कोर्स सञ्चालनको पहिलो दिन काठमाण्डौं विश्वविद्यालयका सहजकर्ता विज्ञ द्वय डा. हेमराज काफ्ले र डा. प्रकाशचन्द्र भट्टराईले कोर्सको प्रकृति र महत्व उल्लेख गर्दै ४८ घण्टाको अवधिमा सहभागीहरूले आर्टिकल लेखन‚ प्रकाशन र अनुसन्धान गर्न सक्षम हुने बताएका छन् । उक्त कोर्स लिनका लागि क्याम्पसका २८ जना शिक्षक तथा कर्मचारीहरूले भर्ना लिएका छन् । उक्त कोर्स सञ्चालन भौतिक रुपले उपस्थित भएर र अनलाइन माध्यबाट हुने भएकाले सो समयमा कोर्स लिने सहभागीहरूले पालना गर्नु पर्ने नियम‚ तालिमको गुणस्तर‚ औचित्य र यसबाट क्याम्पस तथा सहभागीको प्राज्ञिक विकासमा कोर्सले पुर्याउने सहयोगको विषयमा अनुसन्धान व्यवस्थापन एकाइले तयार गरेको आचार संहिता समेत प्रस्तुत गरिएको छ ।

क्याम्पसमा विदेशी गेष्ट लेक्चररबाट कक्षा सहजीकरण कार्यक्रम सम्पन्न

सुकुना बहुमुखी क्याम्पस‚ सुन्दरहरैँचा‚ मोरङमा मिति २०८० फागुन ३० गते देखि
चैत्र ५ गतेसम्म सात दिनका लागि आसाम डाउन टाउन युनिभर्सिटि‚ गुवाहाटी‚
भारतका सहप्राध्यापक डा. विशाल भुईँयानले सहजीकरण कार्य सम्पन्न गरेका छन्
। यस अवधिमा भुईँयानले एमबिएस‚ बिबिएस र बिबिएका सबै कक्षाहरू विद्यार्थी
तथा शिक्षकहरूलाई शिक्षण सिकाइ‚ शैक्षणिक विधि‚ शिक्षणमा प्रविधिको प्रयोग‚ मूल्याङ्कनका नविनतम विधिहरू‚ ज्ञानको विश्वबजारीकरणका उपाय‚ पठन तथा लेखन एवम् प्रकाशन संस्कृतिका विषयमा विश्वविद्यालयका अनुभव र प्रयोगका विषयमा सहजीकरण गरेका छन् । सहजीकरणका क्रममा क्याम्पसको अनुसन्धान व्यवस्थापन एकाइ र आसाम डाउन टाउन युनिभर्सिटिले मिलेर गर्न सकिने अनुसन्धान तथा प्रकाशनका क्षेत्रहरूका विषयमा गहनतम छलफल गरिएको र यसबाट क्याम्पसले अन्तर्राष्ट्रिय स्तरका विश्वविद्यालय र शैक्षिक प्रतिष्ठनाहरू सँग पहुँच विस्तार गरी विद्यार्थीहरूलाई ती अनुसन्धानमा जोड्न सकिने विषयमा सहजीकरण गरेका छन् । चैत्र ५ गते विहान क्यापस सञ्चालक समिति‚ लेखा तथा पुनरावेदन समिति‚ सहायक क्याम्पस प्रमुखहरू र विभागीय प्रमुखहरूको उपस्थितिमा क्याम्पसको राष्ट्रिय तथा अन्तर्राष्ट्रिय मामिला विभागद्वारा आयोजना गरिएको विदाइ कार्यक्रममा सञ्चालक समितिका अध्यक्ष केशव अधिकारी र क्याम्पस प्रमुख अर्जुनराज अधिकारीले विदेशी विश्वविद्यालयका विज्ञ डा. भुईँयानलाई माला‚ खादा‚ नेपाली टोपि लगाएर कदर तथा प्रशंसापत्र र मायाको चिनोसहित विदाइ गरिएको थियो । विदाइ ग्रण गर्दै डा. भुईँयानले क्याम्पसको भौतिक‚ प्राज्ञिक र सामुहिक क्रियाकलाप हेर्दा सुकुना क्याम्पस कुनै विश्वविद्यालयभन्दा कम नरहेकोमा सन्तोष व्यक्त गर्दै छिटै अर्को टोलि लिएर आउने प्रतिवद्धता जाहेर गरेका छन् ।

क्याम्पसमा ननक्रेडिट कोर्सको एक चक्र समापन र प्रमाणपत्र वितरण

सुकुना बहुमुखी क्याम्पस‚ सुन्दरहरैँचा‚ मोरङले विश्वविद्यालयले निर्धारण गरेको औपचारिक कोर्सवाहेकका ननक्रेडिटका कोर्सहरू सञ्चालन गर्दै आइरहेको छ । मिति २०८० फागुन २४ गते विहीबार विहान भएको एक कार्यक्रममा ननक्रेडिट कोर्सका रुपमा वेवडिजाइनिङ डिजेङ्गो कोर्स लिएका २६ जना उत्कृष्ट विद्यार्थीहरूलाई एक समारोहका बिच प्रमाणपत्र वितरण गरिएको छ । क्याम्पसले विश्वविद्यालयका सैद्धान्तिक विषय वाहेक व्यवहारीक‚
प्रयोजनपरक‚ जीवनोपयोगी‚ सिपमूलक र बजार मागमा आधारित कोर्सहरू तर्जुमा गरी औपचारिक कोर्स पूरा गरिसक्दा ननक्रेडटका रुपमा अतिरिक्त ज्ञान तथा सिप दिलाउनका लागि क्याम्पसले विद्यार्थीहरूलाई कम्युटर लिटेरेसि कोर्स‚ एकाउण्टिङ कोर्स‚ स्टाटिस्टिकल कोर्स र वेवडिजाइनिङ डिजेङ्गो कोर्सहरू क्याम्पसले प्रदान गर्ने र यसबाट बढिभन्दा बढि विद्यार्थीहरू लाभान्वित हुने अपेक्षा गरिएको छ ।

क्याम्पसमा विज्ञान‚ प्रविधि तथा व्यवसायिक प्रदर्शनी समापन

सुकुना बहुमुखी क्याम्पस‚ सुन्दरहरैँचा मोरङमा क्याम्पस र विद्यार्थिहरूको व्यवस्थापनमा मिति २०८० फागुन २१ – २३ गतेसम्म विज्ञान‚ प्रविधि तथा
व्यवसायिक प्रदर्शनी SMC InnoveX 2080 सञ्चालन भई मिति २०८० फागुन २३ गते अपरान्हमा एक समारोहका बिच उक्त प्रदर्शनी कार्यक्रमको समापन गरिएको छ । क्याम्पसको प्राङ्गणमा तीन दिनसम्म सञ्चालित उक्त प्रदर्शनीमा झापा‚ मोरङ र सुनसरीका विभिन्न क्याम्पस‚ विद्यालय‚ समूदाय‚ व्यापारिक प्रतिष्ठान‚ अभिभावक‚ शिक्षक र विद्यार्थीहरू गरी पचास हजारभन्दा बढिले अवलोकन गरेका छन् । प्रदर्शनीमा विद्यार्थी र व्यवसायिहरूका जम्मा ४९ स्टलहरू राखिएका थिए भने व्यवस्थापन सङ्कायका विद्यार्थीहरूको सकृयतामा सफल व्यवसायी‚ उद्योगी‚ व्यापारी र उत्प्रेरकको सहजीकरणमा विद्यार्थीहरू बिच प्यानेल छलफल सञ्चालन गरिएको थियो । त्यस्तै प्रदर्शनीलाई आकर्षक बनाउन विद्यार्थीहरूबाट विविध प्रकृतिको साँस्कृतिक तथा साहित्यिक कार्यक्रम सञ्चालन गरिएको थियो । प्रदर्शनीमा स्टल राख्ने विद्यार्थी‚ व्यापारी‚ प्रतिष्ठान र स्वयमसेवकहरूलाई क्याम्पसबाट प्रमाणपत्र वितरण गरिएको थियो ।

 

क्याम्पसमा सेयर सचेतना कार्यक्रम सम्पन्न ।

पूर्वविद्यार्थी समाज‚ सुकुना बहुमुखी क्याम्पस‚ सुन्दरहरैँचा‚ मोरङको आयोजनामा मिति २०८० फागुन १८ गते शुक्रबारका दिन क्याम्पस सभाकक्षमा सेयर सचेतना कार्यक्रम सम्पन्न गरिएको छ । उक्त सचेतना कार्यक्रम विहानी र दिवासत्रमा सञ्चालन गरिएको थियो । विहानीसत्रमा सञ्चालित कार्यक्रममा एबिएस‚ बिएड‚ बिबिएस र बिएमा अध्ययनरत विद्यार्थीहरू सहभागी भएका थिए । त्यसैगरी दिवासत्रमा बिएस्सि र बिबिएमा अध्ययनरत विद्यार्थीहरू सहभागी थिए । कार्यक्रममा शिक्षक तथा कर्मचारीहरूको पनि उपस्थिति रहेको थियो । दुबै सत्रका कार्यक्रममा विशेषज्ञका रुपमा आमन्त्रित एसपिएसए सेक्युरिटिज लिमिटेड ब्रोकर ८७ का चार्टर एकाउण्टेण्ट एवम् डाइरेक्टर श्री सुभाष आचार्य र अर्का डाइरेक्टर मोहन चम्लागाईँ ले सेयर तथा सेयस बजारको अर्थ‚ उद्धेश्य‚ सेयर बजारमा प्रवेश गर्ने तरिका‚ यसका फाइदा‚ सेयर कारोबारबाट फाइदा आर्जन गर्ने तरिका‚ सेयर बजारमा अपनाउनु पर्ने सावधानीहरू‚ सेयर कारोबारका तरिकाहरू‚ ब्रोकर बन्नका लागि हुनुपर्ने गुण तथ कार्यहरू‚ सेयर कारोबारबाट गर्न सकिने आर्थिक तथा व्यवसायिक प्रगति‚ सेयरबजारले अर्थतन्त्रमा पार्ने बहुआयामिक प्रभावका विषयमा सहभागी विद्यार्थी‚ शिक्षक‚ कर्मचारीहरू र पूर्वविद्यार्थीहरूलाई अभिमुखीकरण गर्नु भएको थियो ।

क्याम्पसमा अतिरिक्त क्रियाकलाप कार्यक्रम समापन

सुकुना बहुमुखी क्याम्पस‚ सुन्दरहरैँचा‚ मोरङको अतिरिक्त क्रियाकलाप समितिको वार्षिक कार्ययोजनाअनुसार विभिन्न तह‚ सङ्काय र कक्षाहरूमा अध्ययनरत विद्यार्थीहरूका लागि फागुन ३ गते देखि १८ गतेसम्म एथलेटिक्स‚ भलिवल‚ क्रिकेट‚ वास्केटवल र फुटवल खेलकुद कार्यक्रम सञ्चालन गरी सो कार्यक्रम शुक्रबार सम्पन्न गरिएको छ । उक्त कार्यक्रममा एथलेटिक्सतर्फ १०० मिटर दौडमा ७ जना छत्र र ९ जना छात्रा‚ २०० मिटर दौडमा ७ जना छात्र र ९ जना छात्रा‚ ४०० मिटरम १० जना छात्र र ८ जना छात्रा‚ ८०० मिटर दौडमा ५ जना छात्र र ६ जना छात्रा र १५०० मिटर दौड ८ जना छात्र र ६ जना छात्रा सहभागी भएका थिए । हाइजम्प खेलमा १८ जना छत्र र ११ जना छात्रा ‚ लङजम्प खेलमा १९ जना छात्र र १४ जना छात्रा तथा सटपुट खेलमा ९ जना छत्र र १६ जना सहभागी भएका थिए । भलिवल खेलमा छात्रातर्फ जम्मा ५ वटा टिम रहेकोमा बिबिएस‚ बिएस्सि‚ बिएडको संयुक्त टोली प्रथम र बिबिएस‚ बिएस्सिको टोली द्वितीय भएको र छत्रतर्फ जम्मा १३ टिम रहेकोमा बिबिएस‚ बिएस्सि‚ बिएडको संयुक्त टोली प्रथम र बिबिएस‚ बिएस्सिको टोली द्वितीय भएका छन् । क्रिकेटतर्फ जम्मा १० वटा टिम सहभागी भएकोमा बिआईसिटीईले प्रथम स्थान र बिबिएस कक्षाले द्वितीय स्थान हासिल गर्न सफल भएका छन् । बास्केट वल खेलमा जम्मा ६ समूह सहभागी भएकोमा बिबिएस चौथो वर्षको समूह प्रथम र बिबिएस तेस्रो वर्षको समूह दोस्रो भएका छन् । फुटवल खेलतर्फ जम्मा २० टिम सहभागी भएकोमा बिबिएस समूह प्रथम र बिएड/बिआईसिटिई समूह द्वितीय भएका छन् । क्याम्पसले मिति २०८० फागुन २३ गतेका दिन एक कार्यक्रमको आयोजना गरी विभिन्न खेलमा प्रथम र द्वितीय हुने विद्यार्थीहरूलाई पुरस्कारको व्यवस्था गरिएको छ । जसअनुसार भलिवल‚ फुटवल‚ वास्केटवल र क्रिकेटमा प्रथम हुने प्रत्येक समूहलाई रु. १०‚५००/- नगद ‚ मेडल र प्रमाणपत्र तथा द्वितीय हुने प्रत्येक समूहलाई रु.५‚५००/- नगद‚ मेडल र प्रमाणपत्र तथा एथलेटिक्स तर्फ प्रथम‚ द्वितीय र तृतीय हुनेलाई मेडल र प्रमाणपत्रबाट सम्मान गरिएको छ ।

 

त्रिवि‚ व्यवस्थापन सङ्कायका डीनबाट शिक्षण तथा अभिमुखीकरण सम्पन्न

मिति २०८० फागुन १३ गतेका दिन यस सुकुना बहुमुखी क्याम्पस, सुन्दरहरैँचामा त्रिवि, व्यवस्थापन सङ्कायका डीन प्रा. डा. डिल्लीराज शर्माबाट बिबिए र एमबिएसका विद्यार्थीहरूलाई अतिथि प्राध्यापकका रुपमा विहान ७:०० बजे देखि अपरान्ह ४:०० बजेसम्म शिक्षण तथा अभिमुखीकरण कार्य सम्पन्न भएको छ । विहान एमबिएस प्रथम र द्वितीय सिमेष्टरका विद्यार्थीहरूलाई सिमेष्टर प्रणालीमा शिक्षक र विद्यार्थीले गर्नु पर्ने कार्यहरू, मूल्याङ्कन पद्दति, शिक्षण विधि, परियोजना कार्य, खोज तथा अनुसन्धान, अनुसन्धानात्मक लेख लेखन तथा प्रकाशन, रोजगारीको सिर्जना, बजारीकरण, पाठ्यक्रमको कार्यन्वय, नेतृत्व विकास, श्रम बजारमा व्यवस्थापन विषयका विद्यार्थीहरूको पहुँच र व्यक्तित्व विकासका तरिकाका विषयमा अभिमुखीकरण गर्नु भएको थियो । दोस्रोसत्रमा प्रा.डा. शर्माले बिबिए तर्फ प्रथम, तेस्रो, चौथो र छैटौँ सेमिष्टरका विद्यार्थीहरूलाई केस स्टडि, परियोजना कार्य, प्रतिवेदन लेखन, सर्भे, खोजकार्यको प्रस्तुतीकरण, अध्ययन तथा शिक्षण विधि, मूल्याङ्कन पद्दति, व्यक्तित्व विकास गर्ने तरिका, समय व्यवस्थापन र विश्व बजारमा व्यवस्थापन विषयको सम्भावनाका विषयमा अभिमुखीकरण गर्नु भएको थियो ।