क्याम्पसले दोस्रो चरणको गुणस्तरको प्रमाणपत्र (गुणस्तर सुनिश्चितता प्रत्यायान- Quality Assurance Accreditation – QAA) प्राप्तिका लागि विश्वविद्यालय अनुदान आयोग नेपाल समक्ष आसयपत्र पेस गरेकोमा अनुदान आयोग नेपालको विज्ञटोलीले क्याम्पसको अनुगमन तथा मूल्याङ्कनका लागि पुस २२ गते क्याम्पसमा आइपुगेको थियो । उक्त टोलीले पुस २२ गते देखि २६ गतेसम्म पाँच दिनको भ्रमण सम्पन्न गरेको छ । त्रिभुवन विश्वविद्यालयका पूर्वउपकुलपति प्रा.डा. तीर्थराज खनियाको नेतृत्वमा प्रा.डा. सुशीलभक्त माथेमा‚ प्रा.डा. रेजिना मास्के र अनुदान आयोगको क्युएए डेपुटि डाइरेक्टर श्री भगवती पौडेल सहितको टोलीले क्याम्पसका विभिन्न सरोकारवालाहरू सँग बैठक‚ छलफल‚ अन्तर्क्रिया र प्रश्नोत्तर गरी क्याम्पस प्रति धारणा बुझ्दै क्याम्पसका सबै डकुमेण्टहरूको अध्ययन र मूल्याङ्कन गर्ने कार्य सम्पन्न गरेको छ । यस क्रममा भ्रमणको पाचौँ दिन मिति २०८० पुस २६ गते विहिबारका दिन क्याम्पसमा आयोजित एक कार्यक्रममा अनुदान आयोगको विज्ञटोली र क्याम्पस बिच अध्ययन तथा मूल्याङ्कन प्रतिवेदन आदानप्रदान गरी भ्रमण समापन भएको छ ।
विश्वविद्यालय अनुदान आयोग नेपालको PRT टोलीबाट क्याम्पसको गुणस्तर‚ भौतिक‚ शैक्षिक‚ सामाजिक र व्यवस्थापकीय पक्षहरूको निरन्तर मूल्याङ्कन गरिहरेको छ । मिति २०८० साल पुस २५ गते बुधबारका दिन चौथो दिन अनुदान आयोग नेपालबाट त्रिभुवन विश्वविद्यालयका पूर्वउपकुलपति प्रा.डा. तीर्थराज खनियाको नेतृत्वमा प्रा. डा. सुशिलभक्त माथेमा‚ प्रा.डा. रेजिना मास्के र अनुदान आयोगकी क्युएए डेपुटि डाइरेक्टर भगवती पौडेल समेत रहेको विज्ञटोलीले वभिन्न पक्षहरूको शुक्ष्म मूल्याङ्कन गरेको छ । यस क्रममा टोलीले क्याम्पस सञ्चालक
समिति सँग क्याम्पसको दूरदृष्टि‚ गन्तव्य‚ रणनीति‚ कार्ययोजना‚ नीति तथा कार्यक्रम‚ शैक्षिक कार्यक्रम‚ बजेट‚ दीर्घकालीन योजना‚ दिगोपन आदि विषयमा सघन छलफल गरेको थियो । टोलीले मूल्याङ्कन‚ छलफल र अन्तर्क्रियाका सबै कामहरू सम्पन्न गरिसकेको र विहिबार विहान ८:३० बजे प्रतिवेदन हस्तान्तरण 
गर्ने कार्यक्रम रहेको छ ।
मिति २०८० पुस २४ गते मङ्गलबारका दिन क्याम्पसको दोस्रो चरणको क्युएए(QAA) नविकरणका लागि विश्वविद्यालय अनुदान आयोग नेपाल (UGC Nepal) को समकक्षी पुनरावलोकन टोलीका संयोजक प्रा.डा. तीर्थराज खनिया‚ प्रा.डा. सुशीलभक्त माथेमा‚ प्रा.डा. रेजिना मास्के र आयोगको क्युएए (QAA) की डेपुटि डाइरेक्ट भगवती पौडेलबाट तेस्रो दिनको अनुगमन‚ छलफल‚ अन्तर्क्रिया र मूल्याङ्कनको कार्य सम्पन्न भएको छ । तेस्रो दिन पहिलो चरणमा क्याम्पसमा कार्यरत कर्मचारीहरू सँग‚ दोस्रो चरणमा उक्त टोलीले अभिभावक र नागरिक समाजका प्रतिनिधिहरू सँग‚ तेस्रो चरणमा विज्ञ टोलीले अनुसन्धान व्यवस्थापन एकाइ (RMC-Sukuna) सँग‚ चौथो चरणमा टोलीले आन्तरिक गुणस्तर सुनिश्चितता समिति र स्वमूल्याङ्कन समिति सँग छलफल र अन्तर्क्रिया गरेको छ भने पाचौँ चरणमा क्याम्पस प्रमुख र सहायक क्याम्पस प्रमुखहरू सँग बैठक गरेको छ । छैटौँ चरणमा क्याम्पसमा अध्ययनरत विद्यार्थीहरूको प्रतिभा प्रदर्शन अन्तर्गत विद्यार्थीहरूले प्रस्तुत गरेका नृत्य‚ गायन र कविता वाचनको अवलोकन गरेको छ । विज्ञ टोलीले बुधबार चौथो दिनको छलफल‚ सुपरिवेक्षण र मूल्याङ्कनको काम पूर्वनिर्धारित कार्यतालिकाअनुसार नै गर्ने छ ।
क्याम्पसमा विश्वविद्यालय अनुदान आयोग नेपालको समकक्षी पुनरावलोकन गर्ने विज्ञटोलीले मिति २०८० पुस २३ गते सोमबार दोस्रो दिनको छलफल‚ अन्तर्क्रिया‚ अनुगमन र अध्ययनको काम सम्पन्न गरेको छ । अध्ययन टोलीका प्रमुख तथा त्रिभुवन विश्वविद्यालयका पूर्वउपकुलपति प्रा.डा. तीर्थराज खनियाँ‚ सदस्यहरू क्रमशः प्रा.डा. सुशिलभक्त माथेमा‚ प्रा.डा. रेजिना मास्के र अनुदान आयोग क्युएए डिभिजनकी डेपुटि डाइरेक्टर श्री भगवती पौडेलले पहिलो चरणमा स्नातक र स्नातकोत्तर तहका विद्यार्थीहरू सँग‚ दोस्रो चरणमा पूर्वविद्यार्थी समाजका सदस्यहरू तथा प्रतिनिधिहरू सँग क्याम्पसका लागि पूर्वविद्यार्थीहरू सँग‚ तेस्रो चरणमा क्याम्पसबाट उत्पादित जनशक्तिलाई रोजगारी दिने रोजगारदाता सङ्घ/संस्था‚ उद्योग‚ व्यापारिक प्रतिष्ठान‚ सहकारी एवम् वित्तिय निकायका प्रतिनिधिहरू सँग‚ चौथो चरणमा पठनपाठन‚ परीक्षा‚ शिक्षणमा प्रविधिको प्रयोग‚ पेशागत सन्तुष्टि‚ वृत्तिविकास‚ अध्ययन अनुसन्धानका विषयमा क्याम्पसका शिक्षकहरू सँग‚ पाचौँ चरणमा क्याम्पसमा रहेका विभिन्न विषयगत विभागीय समितिका विभागीय प्रमुखहरू सँग र छैटौँ चरणमा क्याम्पसमा रहेका विभिन्न समिति‚ उपसमिति‚ एकाइ‚ सेल‚ सर्कल र क्लव सँग सघन छलफल र अन्तर्क्रिया गर्ने काम सम्पन्न गरेको छ । सातौँ चरणमा टोलीले क्याम्पसका विभिन्न विभाग‚ फाँट तथा शाखाको अनुगमन गर्दै अभिलेखको शुक्ष्म अध्ययन गरी मार्ग निर्देशन दिएको छ । पुनरावलोकन तथा मूल्याङ्कन टोलीले तेस्रो दिन पुस २४ गतेका सबै कार्यक्रमहरू पूर्वनिर्धारित तालिकाअनुसार नै हुनेगरी दोस्रो दिनको कार्य सम्पन्न गरेको छ ।
विश्वविद्यालय अनुदान आयोग नेपालबाट QAA मूल्याङ्कन प्रयोजनको लागि मिति २०८० पुस २२ गतेका दिन समकक्षी पुनरावलोकन टोली
क्याम्पसमा आएको छ । उक्त टोलीमा त्रिभुवन विश्वविद्यालयका पूर्वउपकुलपति प्रा.डा. तीर्थराज खनियाँको संयोजकत्वमा प्रा.डा.
सुशिलभक्त माथेमा‚ प्रा.डा. रेजिना मास्के र अनुदान आयोगको QAA डिभिजन डेपुटि डइरेक्टर भगवती पौडेल सहितको टोलीद्वारा पुस २२ गते देखि २६ गतेसम्म पाँच दिन क्याम्पस सञ्चालक समिति‚ लेखा समिति‚ पुनरावेदन समिति‚ क्याम्पस प्रशासन‚ विभागीय प्रमुख‚ शिक्षक‚
विद्यार्थी‚ पूर्वविद्यार्थी‚ अभिभावक‚ रोजगारदाता र अन्य सरोकारवालाहरू सँग बसेर छलफल‚ अन्तर्क्रिया‚ प्रश्नोत्तर गर्नेछ । यसक्रम
टोलीले क्याम्पसका नीति‚ नियम‚ निर्देशिका‚ कार्यक्रम‚ अभिलेख‚ अनुसन्धान क्रियाकलाप‚ पठनपाठन‚ कार्यालय सञ्चालन‚ भौतिक पक्षको
अनुगमन र मूल्याङ्कन गर्नेछ ।
यसक्रममा आइतबार अपरान्हमा उक्त टोलीलाई क्याम्पसमा स्वागत गरिएको थियो । क्याम्पस सञ्चालक समिति‚ लेखा समिति‚ पुनरावेदन समिति‚ क्याम्पस प्रशासन‚ विभागीय प्रमुख‚ शिक्षक‚ विद्यार्थी‚ पूर्वविद्यार्थी‚ अभिभावक‚ रोजगारदाता र अन्य सरोकारवालाहरूको उपस्थितिमा भएको स्वागत कार्यक्रम क्याम्पस सञ्चालक समितिका अध्यक्ष श्री केशव अधिकारीको सभापतित्वमा भएको स्वागत कार्यक्रममा क्याम्पस प्रमुख अर्जुनराज अधिकारीले स्वागत मन्तव्य राख्नु भएको थियो । क्याम्पसको स्वमूल्याङ्कन समितिका संयोजक नरप्रसाद भण्डारीले पहिलो चक्रमा क्याम्पसले QAA प्राप्त गरेपछि र हालसम्ममा गरेका उपलब्धिहरू सहित पच्चिस वर्षे गुरुयोजनाको खाका प्रस्तुत गर्नु भएको थियो । कार्यक्रममा टोलीका संयोजक प्रा.डा. खनियाँले पहिलेको तुलनामा क्याम्पसले गुणस्तरमा सुधार गरेकोमा सन्तोष व्यक्त गर्नु भएको छ ।औपचारीक कार्यक्रमको समापन पछि विज्ञ टोलीले भौतिक पक्ष‚ विभागीय गतिविधि‚ विभागका अभिलेख र पुस्तकालयको एकसरो अध्ययन गरेको थियो । भोली मिति २०८० पुस २३ गते सोमबार विहान देखि अपरान्नसम्म पूर्वनिर्धारित तालिकाअनुसार विद्यार्थीहरू‚ पूर्वविद्यार्थीहरू‚रोजगारदाताहरू‚ शिक्षकहरू‚ विभागीय प्रमुखहरू र विभिन्न समिति तथा उपसमितिहरू सँग छुट्टाछुट्टै छलफल र अन्तर्क्रिया हुनेछ। 
सुकुना बहुमुखी क्याम्पस‚ सुन्दरहरैँचा‚ मोरङको नेपाली शिक्षण विभाग अन्तर्गत रहेको अतिरिक्त क्रियाकलाप उपसमितिको आयोजनामा मिति २०८० पुस २० गते शुक्रबारका दिन क्याम्पस सभाकक्षमा शिक्षक तथा विद्यार्थीहरू बिच कविता गोष्ठि सम्पन्न भएको छ । उपसमितिका संयोजक दीपक गौतमको सभापतित्वमा भएको उक्त कविता गोष्ठिमा शिक्षक तथा विद्यार्थीहरू गरी जम्मा २७ जनाले कविहरूले कविता रचना
वाचन गरेका छन् । कार्यक्रममा कविता समीक्षक‚ शिक्षक तथा विद्यार्थीहरूको उपस्थिति रहेको थियो । उक्त कार्यक्रमको सञ्चालन उपसमितका सदस्य शिक्षणसहायक रेखा सुवेदीले गरेकी थिइन् ।
मिति २०८० साल पुस १७ गतेका दिन बिआईसिटिई प्रथम सेमिष्टरमा अध्ययन गर्न आउने नवआगन्तुक विद्यार्थीहरूलाई क्याम्पसको उक्त
विभागले मङ्गलबारका दिन एक समारोह बिच साँस्कृतिक कार्यक्रम सहित खादा र फुलमाला तथा अविर लगाएर स्वागत गरिएको छ । उक्त
कार्यक्रममा आठौँ सेमिष्टर पूरा गरेका विद्यार्थीहरूलाई फूलमाला‚अविर लगाएर र मायको चिनो हस्तान्तरण गरी विदाइ पनि गरिएको छ ।
कार्यक्रमको पहिलो सत्रमा नवआगन्तुक विद्यार्थीहरूका लागि अभिमूखीकरण गरिएको थियो । अभिमूखीकरण कार्यक्रममा कोर्सको
प्रकृति‚ आन्तरिक र वाह्य मूल्याङ्कन‚ प्रयोगात्मक र परियोजनात्मक कार्य‚ क्याम्पसले प्रदान गर्ने सेवा सुविधा र विद्यार्थीहरूले पालना गर्नु पर्ने
नियमका विषयमा स्पष्ट पारिएको थियो । दोस्रो सत्रको कार्यक्रममा क्याम्पस सञ्चालक समितिका अध्यक्ष केशव अधिकारी र क्याम्पस प्रमुख
अर्जुनराज अधिकारीले नवआगन्तुक विद्यार्थीहरूलाई स्वागत गर्दै तह पार
गरेका विद्यार्थीहरूलाई विदाइ गर्नु भएको थियो ।
मिति २०८० साल पुस १६ गते सोमबारका दिन अपरान्हमा क्याम्पसमा विभिन्न चरणमा विद्यार्थीहरू सँग छलफल र अन्तर्क्रिया कार्यक्रम सम्पन्न
गरिएको छ । पहिलो चरणमा बीएस्सी दोस्रो वर्षमा अध्ययनरत विद्यार्थीहरूको आन्तरिक परीक्षाको नतिजा सार्वजनिक गर्दै उत्कृष्ट स्थान
हासिल गर्ने तीनजना विद्यार्थीहरूलाई पुरस्कार वितरण गरियो । दोस्रो चरणमा उक्त तहमा अध्यापनरत शिक्षकहरूको अनुपस्थितिमा र क्याम्पस प्रमुख तथा सहायक क्याम्पस प्रमुखहरूले सो कक्षाको पठनपाठन‚ पुस्तकालय‚ प्रयोगशाला‚ शिक्षक/कर्मचारीका व्यवहार‚ कोर्सको अवस्थाका विषयमा खुलेर छलफल तथा अन्तर्क्रिया कार्यक्रम गरी गुनासो सुन्ने र पृष्ठपोषण लिने काम गरियो र तेस्रो चरणमा बिबिए छैटौँ सेमिष्टरमाअध्ययनरत विद्यार्थीहरू बिच छलफल तथा अन्तर्क्रिया कार्यक्रम र गुनासो सुन्ने कार्य गरियो ।
क्याम्पस र स्वतन्त्र विद्यार्थी युनियनको संयुक्त आयोजनामा तथा क्याम्पसमा रहेका सबै विद्यार्थीहरूका सङ्घ/सङ्गठनहरूको सहभागितामा
विभिन्न सँस्कृतिक कार्यक्रम सहित क्याम्पस प्राङ्गणमा नवआगन्तुक विद्यार्थीहरूलाई स्वागत कार्यक्रम सम्पन्न गरिएको छ । स्वतन्त्र विद्यार्थी
युनियनका अध्यक्ष सन्तोष लिम्बूको सभापतित्वमा भएको उक्त कार्यक्रमको समुद्घाटन क्याम्पस सञ्चालक समितिका अध्यक्ष केशव अधिकारीले गर्नु भएको थियो । क्याम्पस प्रमुख अर्जुनराज अधिकारीले नवआगन्तुक विद्यार्थीहरूलाई स्वागत गर्दै अध्ययन‚ अध्यापन‚ अतिरिक्त क्रियाकलाप‚ खोज अनुसन्धान‚ व्यक्तित्व विकास र शैक्षिक नतिजाका क्षेत्रमा क्याम्पसलाई गुणस्तरीय थलो
बनाउने कार्यमा जोड दिनु भएको थियो । उक्त कार्यक्रममा अखिल क्रान्तिकारीका सत्तीस कार्की‚ नेविसङ्घका विजय ओझा‚ अनेरास्ववियूका रोहन खत्री र अनेरास्ववियुका योगेश दाहालले विद्यार्थी एकतामा जोड दिँदै नवआगन्तुक विद्यार्थीहरूलाई स्वगत गरेका थिए । स्वागत कार्यक्रम दुई चरणमा सञ्चालन गरिएको थियो । पहिलो चरणको कार्यक्रमको सञ्चालन स्ववियु सचिव एलिस ओझाले गरेका थिए भने दोस्रो चरणको साँस्कृतिक कार्यक्रमको सञ्चालन स्ववियु सदस्य मधु घिमिरेले गरेकी थिइन् । दोस्रो चरणमाअतिथिका रुपमा उपस्थित राष्ट्रिय रुपमा ख्यातिप्राप्त हाँस्यव्यङग्यका सम्राट मनोज गजुरेलले राजनीतिक‚ सामाजिक‚ साँस्कृतिक र शैक्षिक क्षेत्रमा देखिएका विकृति तथा विसङ्गति माथि कडा व्यङ्ग्य प्रहार गर्दै जनस्तरबाट सुसञ्चालित यति भव्य रुपमा सञ्चालित सुकुना बहुमुखी क्याम्पसबाट आफू लोभिएको
बताउनु भयो । कार्यक्रममा विद्यार्थी कलाकारहरूले ५ वटा गायन र ३२ वटा नृत्य प्रस्तुत गरेका थिए । उक्त कार्यक्रममा शिक्षक‚ कर्मचारी‚ विद्यार्थी‚ विद्यार्थीका सङ्घ सङ्गठनका नेता‚ पूर्वस्ववियुका सभापति एवम् पदाधिकारीहरू‚ पूर्वविद्यार्थीहरू‚अभिभावक र पत्रकारहरूको उपस्थिति रहेको थियो । स्वागत कार्यक्रम विहान ९:०० बजे देखि अपरान्ह ५:०० बजेसम्म ८ घण्टा चलेको थियो ।