सुकुना वहुमुखी क्याम्पसको आयोजना र विश्वविद्यालय अनुदान आयोग सानोठिमी भक्तपुरको सहयोगमा  मिति २०७४ साल भदौ २४ देखि २८ गतेसम्म पाँच दिवशीय Academia- Industry Dialogue कार्यक्रम सम्पन्न गरियो  । उक्त कार्यक्रमको उद्घाटन सत्र मिति २०७४ भदौ २४ गतेका दिन क्याम्पस सञ्चालक समितिका सदस्य श्री केदारप्रसाद गुरागाईँको सभापतित्व र व्यवस्थापन विभागका विभागीय प्रमुख बलराम पोखरेलले सञ्चालनमा सम्पन्न भएको थियो । उद्घाटन सत्रमा उद्योग वाणिज्य सङ्घ कोसीहरैँचाका अध्यक्ष श्री नवराज चापागाईँले आफ्नो सङ्गठन उच्च शैक्षिक संस्था संग मिलेर कार्यगर्न उत्साहित रहेको बताउनु भयो । सो कार्यक्रममा प्राध्यापक सङ्घका अध्यक्ष श्री अर्जुनराज अधिकारी, पथरी बहुमुखी क्याम्पसका क्याम्पस प्रमुख श्री चेतन पौडेल, उद्योगी श्री भोलेश्वर दुलाल र पूर्वक्याम्पस प्रमुख श्री पीतकुमार श्रेष्ठले क्याम्पसले गरेका प्रयासहरूप्रति सन्तोष व्यक्त गर्दै  कार्यक्रमको सफलताको शुभकामना दिनु भएको थियो । प्रमुख अतिथिका रुपमा त्रिवि परीक्षा नियन्त्रण कार्यालय पूर्वाञ्चल क्षेत्रका सहनियन्त्रक श्री अर्जुनविक्रम खडकाले प्राज्ञिक क्षेत्र तथा उद्योग, व्यापार तथा व्यवसायिका बीच सहकार्य गर्न सकेमा उद्यशीलताको विकास हुने र रोजगारीको सिर्जना हुने विश्वास व्यक्त गर्दै कार्यक्रमको सफलताको शुभकामना दिनुभएको थियो । उद्घाटन सत्र पछि सोहिदिन देखि प्राज्ञिक र उद्योगी बीच छलफल कार्यक्रम सञ्चालन गरिएको थियो । यसक्रममा पूर्वाञ्चल ल्युव आयलका लि. का प्रवन्ध निर्देशक श्री भोलेश्वर दुलालले व्यवसायिक दक्षताका लागि उच्च शैक्षिक संस्थाले खेल्नु पर्ने भूमिकाका सम्बन्धमा सहजिकरण गर्नु भएको थियो । कार्यक्रममा समूह छलफल भई निष्कर्ष प्रस्तुत गरिएको थियो ।
उक्त कार्यक्रमको मुख्य उद्देश्य प्राज्ञिक तथा व्यवसायिक क्षेत्र बीच सुमधुर सम्बन्ध कायम र विस्तार गर्नु, व्यवसायिक तथा शैक्षिक क्षेत्रमा देखिएका खाडलहरू पहिचान गर्दै निराकरणका उपायहरूको खोजी गर्नु, उच्च शिक्षा प्रदायक संस्था र उद्योग व्यवसाय बीचका सहसम्बन्धका तथा अनुुुसन्धानका क्षेत्रहरूको पहिचान गर्नु, औद्योगिक तथा व्यवसायिक सहकार्यका सम्भावनाहरूको खोजि गर्नु, उद्योग व्यवसाय क्षेत्रले अपेक्षा गरेको गुणस्तरयुक्त मानव संसाधनको उत्पादन गर्न विश्वविद्यालयका पाठ्यक्रममा समसामियक सुधार गर्न सकिने उपायहरू सुझाउनु ।
कार्यक्रमको दोस्रो दिन मिति २०७४ भदौ २५ गतेका पहिलो सत्रमा तेरिज गोल्ड हाउस उर्लाबारीका प्रवन्ध निर्देशक श्री केदार भण्डारीले स्थानीय उद्योग व्यवसायका लागि उच्च शिक्षाबाट उत्पादित जनशक्तिको उपयोग र सान्दर्भिकताका सन्दर्भमा सहजिकरण गर्नु भएको थियो । यसक्रममा सो विषयमा सामूहिक छलफल गरी निष्कर्ष प्रस्तुत गरिएको थियो । सोहि दिनको दोस्रो सत्रमा उद्योग वाणिज्य सङ्घ विराटनगरका पूर्व उपाध्यक्ष श्री भिम घिमिरेले उद्यमशीलताको विकासमा उच्च शैक्षिक संस्थाको भूमिका र विद्यार्थीका लागि औद्योगिक क्षेत्रको सहयोग विषयमा सहजिकरण गर्नु भएको थियो । प्रस्तुति पछि सो विषयमा सहभागिको धारणा प्रस्तुत गर्न लगाइएको थियो ।
कार्यक्रमको तेस्रो दिन मिति २०७४ भदौ २६ गतेको पहिलो सत्रमा मितेरी विकास बैङ्क धरानका प्रमुख कार्यकारी अधिकृत श्री तुलसी वस्तीले वित्तिय संस्था र उच्च शैक्षिक संस्था बीचको पारस्परिक सम्बन्धका विषयमा सहजिकरण गर्नु भएको थियो । सत्रको अन्त्यमा प्रस्तुत विषयमा प्रश्नोत्तर कार्यक्रम सञ्चालन गरिएको थियो । कायक्रमको दोस्रो सत्रमा पूर्वाञ्चल ल्युव आयलका लिमिटेडकाका प्रवन्ध निर्देशक श्री भोलेश्वर दुलालले नेपालमा युवा उद्यमशीलताको सशक्तिकरणका उपाय र चुनौतिहरू भन्ने विषयमा सहजिकरण गर्नु भएको थियो । छलफलका क्रममा सहभागिहरूले सो विषयमा थप उपायहरू प्रस्तुत गरेका थिए ।
कार्यक्रमको चौथो दिन मिति २०७४ भदौ २७ गतेको पहिलो सत्रमा राष्ट्रिय सहकारी बैङ्कका केन्द्रिय अध्यक्ष श्री रमेशप्रसाद पोख्रेलले सहकारी संस्था र उच्च शैक्षिक संस्था बीचको सम्बन्धको विषयमा सहजिकरण गर्नु भएको थियो । प्रस्तुत विषयमा पनि सामूहिक छलफल कार्यक्रम गरी निष्कर्ष प्रस्तुत गरिएको थियो । सोहि दिनको दोस्रो सत्रमा राउत कन्स्ट्रक्सन लिमिटेडका निर्देशक श्री राजेन्द्र राउतले निर्माण व्यवसायबाट हुने रोजगारीको सिर्जना विषयमा सहजिकरण गर्नु भएको थियो । यस विषयमा समेत सामूहिक छलफल गरी निष्कर्ष निकालिएको थियो ।
कार्यक्रमको पाचौँ तथा अन्तिम दिन मिति २०७४ भदौ २८ गतेको पहिलो सत्रमा प्लान्ट डिजाइनर, केमिकल इन्जिनियर तथा बोट्लर नेपाल लिमिटेडका कार्यकारी प्रमुख श्री सञ्जयकुमार शाहले उद्योग व्यवसायले उच्च शिक्षामा र उद्योग व्यवसायलाई उच्च शिक्षाले गर्ने विद्यमान र भावी योगदान विषयमा सहजिकरण गर्नु भएको थयो । यस विषयमा सहभगि उद्योगी, विद्यार्थी र प्राध्यापक बीचमा अन्तरक्रिया गरी निष्कर्ष प्रस्तुत गरिएको थियो । सोहि दिनको दोस्रो सत्रमा क्याम्पस सञ्चालक समितिका जेष्ठ सदस्य श्री नारायणप्रसाद चुडालको सभापतित्वमा समापन कार्यक्रम सञ्चालन गरियो । समापन कार्यक्रममा बेलबारी बहुमुखी क्याम्पसकी सहभागि विद्यार्थी श्री सफलता बुढाथोकी, सुकुना बहुमुखी क्याम्पसकी सहभागि विद्यार्थी श्री सुनिता श्रेष्ठ र प्रकाश खुलाल, कोसीहरैँचा उद्योग वाणिज्य सङ्घका लेखा समिति सदस्य श्री ज्ञानबहादुर बुढाथोकी, महेन्द्र मोरङ आदर्श बहुमुखी क्याम्पस विराटनगरका सहायक क्याम्पस प्रमुख श्री मोहनकुमार श्रेष्ठ, पथरी बहुमुखी क्याम्पस पथरीशनिश्चरेका क्याम्पस प्रमुख श्री चेतन पौडेल र सुकुना वहुमुखी क्याम्पस सञ्चालक समिति सदस्य श्री केशव अधिकारी समेतले कार्यक्रमको समिक्षा गर्दै मन्तव्य प्रस्तुत गर्नु भएको थियो । कार्यक्रममा सहभागिहरूलाई प्रमाणपत्र वितरण गरिएको थियो । कार्यक्रमको अन्त्यमा क्याम्पस प्रमुख श्री प्रेमप्रसाद भट्टराईले सहभागि सबैलाई धन्यवाद ज्ञापन गर्नु भएको थियो । प्रत्येक दिनको  कार्यक्रम सञ्चालन व्यवस्थापन विभागका विभागीय प्रमुख तथा कार्यक्रम संयोजक श्री बलराम पोखरेलले गर्नु भएको थियो ।